U21 – Siegloses Wochenende

Üse erst Match heimer gägä Lok Reinach gha. Am Afang heimer rächt zyt brucht bismer mau chli is Spiu gfunge hei. Lok het mit eim Ahgriff dr Füärigsträffer gmacht. Das hetnis gad bitz gweckt u mir hei churz drufabe z 1:1 u när z 2:1 chönne erzilä. Churz vor dr Pouse isch de Lok no dr Ahschlussträffer glunge u mir si miteme 2:2 it Pouse. Nach dr Pouse heimer viu gueti Aktione gha u hei unbedingt wöue, doch Lok het üs ufzeigt dasses di chline Fähler ir defensive si, wo am Schluss dr Sieg usmache u so hetnis Lok am Schluss miteme 2:4 ufzeigt dasses äbä ni viu brucht um e zwüschezitlechi Füährig här z gäh.

Dr 2 Match heimer gad e viertustund speter gägä t Bern Caps gha. Mä het gloub bi aune gmerkt dass di vorherigi Niderlag noni so verdout isch gsi. Mir hei ou bi däm Match lenger brucht für wider dri z cho. Mir si unglücklech durch e glücksträffer vode Caps miteme 0:1 it Pouse. Ou nach dr Pouse hei bi üs die cheibe Gou eif ni wöue ine gah. Mir hei aber nomau aues gä u churz vor Schluss no z 1:1 erziut. Somit heimer a däm Wucheend zwar numme 1 Punkt mitgno, göh aber glich no aus Tabellefüärend it Wiehnachtspouse.