Am Sunntig am 8:30 Uhr hei mir üs ih üsere Heimhaue ds Chonufinge troffe. Gstartet si mir i dä Matchtag mit ere Videoanalyse vom letschte Match. Nach dr ahschliessende Teamsitzig si mir üs ga ufwerme. Dank em ne super Iischiesse simer ready gsi füre Match. Wie di Grosse hei mir ih die, mit viu Zueschouer u Fans guet gfüuti Haue, dörfe ihloufe. Mir si super ih dä Match gstartet u hei gli chönne ds 1:0 dür üsi Nummer 22 Rahel Kupferschmied, erziele. Dank ärä konstante Leischtig ir Offensive wi oh ihr Deffenive het BEO ih däm erschte Drittu keni gfährleche Torchance chönne usespiele. Am Ändi vom 1. Drittu het üsi Nummer 26,  d’Lynn Schüpbach e Freistoss zum 2:0 chönne verwärte.

Mitere 2:0 Füehrig hei mir chli beruehigt u top motiviert ih di erschti Drittuspouse chönne. Im 2. Drittu hei mir vieli gfährlechi Torchance usegspiut, womer aber leider nid hei gschafft usdsnütze. Wäge re 2 Minute Straf wäg fählendem Abstang vo üs, wie oh für BEO isch für churzi Zit 4 gäge 4 gsi, mir hei ds guet u ohni Gägegou überstange. Im 3. Drittu het BEO nach vorhär viu erfouglose Versüech a üsem super Goali Timea Frey, doch no der Aschlussträffer zum 1:2 chönne erziele. Dür das, dass mir aui no mau Vougas hei gä u änang womer hei chönne ungerstützt hei, hei mir das Spiu gäge Leader zu üsne Gunschte chönne entscheide. Die drei Pünkt hei mir nach etleche knapp verlorene Mätche no so gärn gnoh. Üse Goalie isch sehr vedient zum Bestplayer uszeichnet worde. Mir hei aui dä ussergwöhnlech u spannend Match, daheim u mit so viune Fans wo üs ungerstützt hei henne gnosse.

Mir danke ah de Goalies vo üsere NLB Joëlle Schaad & Firdaus Holle für d‘ Ungerstützig vor u während em Match.

Oh üsne zahuriche Fans, wo üs a däm Sunntigmorge i d’SLM Arena si cho ungerstütze, möchte mir härzlech Mercii säge.

Autorinnen: Leonie & Selina Moser