Dr Tag het früeh am Morge am 6i z Chonu gstartet, wo mir üs ufä Wäg hei gmacht nach Wald z Züri. Scho zum Zmorgä hets bi es paarne Hörndlisalat gä zur Vorbereitig uf üsä Match. Üses Trainerstaff isch dür Mösu u Zoe zusätzläch üngerstützt worde. Die zwo hei i derä Wuchä ä unglücklechi Verletzig am Fuess gmacht u hei somit nid chönnä spilä. Wo mer nachere langä Fahrt ändläch z Wald si acho, hei si üs mit ere wunderschön gschmückte Garderobe überrascht. U für aui hets no es personalisiert Capri Sünnäli gä. Nacheme mässig guete Iloufä hei mir de dr Match ändläch chönnä beginnä. Trotz Närvosität hei mir z erschtä Gou i Ungerzau erziut. D Ungerstützig vom Team het derbi nid gfäut. Trotzdäm steit nachem erschtä Drittu 1:4. Ou z zwöitä Drittu isch nid viu besser gloffä. Grad am Afang hei mir zwar chönnä uf 2:4 ufholä, doch mir hei aber när wider zwü witeri Gou kassiert. Ä chlinä Liechtblick hei mir mitem 3:6 erkämpft. Dr Liechtblick isch leider nid zur Sunnä wordä u es steit somit 3:8. Im letschtä Drittu hei mir zeigt, das mir es mental starchs Team si u Jedi für Jedi git. So hi mir doch no ä guete Schluss für dä hert Kampf chönnä ablifere u si miteme 8:9 vom Fäud trätä. Ds Fazit vo däm hüttigä Match isch, das bi üs d Gou eifach nid hi wöuä ichäga u d Red Lions das usgnützt hei für es effizients Spiu z zigä.
Trotz Niderlag isch üses Motto für di nächschtä Rundinä: Ufgäh isch ke Option!

Autorinnen: Ayana Lehmann & Rahel Kupferschmied